Friday, March 02, 2007

حبيبتي.. شفتج الاسبوع اللي فات

حبيبتي.. شفتج الاسبوع اللي فات.. كنتي في مكان تجمع البنات المعتاد.. شايفتنج من قبل.. أو يمكن أكون مشبهه عليج.. لأنكن صرتن متشابهات ها الأيام..

بصراحة.. ترددت أكتب لج.. أو يمكن أكتب مب بس لج.. حتى لشبيهتج.. وشبيهتها.. وشبيهة شبيهتها..

شو صاير؟ شو اللي تفكرين فيه؟ شو اللي يدور على بالج وانتي طالعة ورايحه لمكان التجمع؟

كيف اخترتي لبسج.. ومكياجج.. واكسسواراتج؟

تعجبتي من أسئلتي؟ تتحريني معجب؟

لا يا حبيبتي مب معجب.. ولا معجبة..

تدرين.. وقفت من بعيد.. أتفرج عليج.. وعلى النسخ اللي يحيطون بج..

ما خطر في بالكن أنكن كوبي من بعض؟ ما خطر في بالكن ان اللي تبحثون عنه مب سهل المنال؟؟ وأن اللي تسوونه للوصول للي في بالكن .. شيء كريه.. ويمكن يعرضكن لخطر ما يدور على بالكن تماما؟!

اكيد ظنيتي أن لما بتلبسين لبس فاضح بتلاقين نظرات الإعجاب.. من أمثالي أو من اللي في سنج.. على فكرة.. كم عمرج؟ أراهن أنج ما تعديتي 17 سنة.. مستعدة أراهن بمليون حتى.. يعني في عمر عيالي.. يعني مستحيل بتلاقين في عيني نظرات الإعجاب.. بالعكس.. عيني كانت غرقانة بدموع التقزز والحسرة..

تدرين أن لباسج ما تلبسه إلا بنات معينات في شوارع معينة من عواصم العالم؟ فهمتيني والا تبغيني اشرح لج أكثر؟ تبغين تفاصيل؟ تبغين تتشبهين بهن؟ نعم؟ مب قصدج؟ عيل شو قصدج من ها اللبس؟ ومن ها المكياج؟ ومن ها الاكسسوارات؟

لا يا حبيبتي.. كونج يالسه بين بنات بس لا يعني أن تفصخين الحياء .. وتعتقدين أن لباسج هذا عادي بين البنات..

هذا اللباس مصمم حق غرض واحد فقط لاغير.. وهو إثارة شهوة الجنس الآخر. صحيح أنج بين بنات.. لكن فيه بنات .. وفيه بنات.. فإذا لباسج مصمم حق الجنس الآخر.. ولنوعية معينة من اللابسات.. ليش تلبسينه؟

فكرتي فيها.. ولو لحظة؟ والا انعميتي ومحيتي تفكيرج؟ وصرتي إمعة زمانج ومكانج؟!

هل هذا شي تفخرين به؟ هل هذا شي تقدرين تطرينه جدام أمج أو أبوج أو أخوج.. أو زوج المستقبل؟ أو عيالج في يوم من الأيام؟......... أشك إذا كانت عندج القدرة على أنج تنظرين بنظرة غير الاحتقار لمثل هذا اللبس.. ولمثل هذا الغرض من اللبس..

يا حبيبتي.. لا تكونين إمعة.. ولا تكونين إنسان مستنتسخ من عشرات الآلاف من البنات اللي ما يفكرن إلا في انعكاس صورتهن في أعين الغير.. ما يشوفن نفسهن إلا في عيون الغير.. وفي يوم من الأيام ما بيعرفن شو هي شخصيتهن الحقيقية.. لأنهن انشغلن سنين في محاولة إيجاد أنفسهن في عيون الغير.. حتى تختفي شخصياتهن.. مثل الغراب اللي بغى يمشي مثل الطاووس.. وفي النهاية لا قدر يمشي مثل الطاووس ولا عرف يرجع يمشي مثل مشيته الأولى..

معقول في زمن وزيرة اقتصاد ووزيرة شؤون اجتماعية وعضوة مجلس وطني ما زال فيه بنات مثلج؟ معقول طموحج ومثلج الأعلى هي الحثالة اللي في الال بي سي وروتانا؟ انتي تعتقدين هاذول مثل أعلى؟ تعتقدين التاريخ بيذكرهن بأنهن أنجزن شي؟ لا يا حبيبتي.. لأن على مدى آلاف السنين، التاريخ سجل لهن شي واحد فقط.. أنهن حثالة المجتمع.. هل هاي هي الطريقة اللي تبغين تدخلين بها أبواب التاريخ؟

في يوم من الأيام بيكون لج شان (على الأقل أتمنى أن ترجعين لصوابج ويوك لج طموح وشان).. وبيكون فيه صور لج ولأيام شبابج وطفولتج.. تبغين حد يطلع لج ها الصورة وانتي على ابواب الترشيح في المجلس الوطني .. أو الوزارة.. أو رئاسة مجلس أو رئاسة شركة أو بنك؟

فكري فيها.. وقرري.. شو تبغين من الصور تطلع لج بعد 25 سنة؟

وأخيرا.. اعذريني.. خوفي عليج خلاني أكتب لج هذا الكلام.. خذيه.. أو لا تاخذينه.. أنا سويت اللي عل
ي!

No comments:

Followers